Македонски Брод - Кичевски регион

Во општина Македонски Брод, во моментот активен е пожарот во атарот на с.Грешница додека пожарите кај селата Растеш, Волче, Заград и Брест се ставени под контрола. Во моментов во овој регион ангажирани се екипи на ЈП „Македонски Шуми“ - Македонски Брод.                   

Пожарот кај м.в.Фрлогоец на Бистра Планина е сеуште активен. Гори сува трева, смрека и нискостеблести дрва, а интервенираат екипи на ШС „Лопушник“.

Велешки регион

Активен е и пожарот кај м.в.Јасеновска глава кој зафаќа површина на подрачјето на општина Прилеп. Гори нискостеблеста шума и сува трева. За гасење на пожарот ангажирани се вработени во ШС „Бабуна“ Велес, а интервенира и еден хелихоптер на АРМ.

Пожарот на подрачјето на с.Галиште опш.Кавадарци е сеуште  активен, истиот се шири под с. Галиште од правец на м.в.Србиново. Еден крак се движи кон Црна Река, а другиот крак се движи кон с.Гуѓаково. Гори сува трева, смрека и ниска дабова шума.

Пожарот кај Мушов Гроб – Мрежичко е ставен под контрола.

Прилепски регион

Пожарот во близина на манастирот Трескавец и населените места Мажучиште, Мараморани и Горно Село е ставен под контрола. Има чадење на одредени места во изгорениот дел. Ангажирани се пожарникари и доброволци за контрола на пожарот (опш.Прилеп) и не постои опасност од загрозување на манастирот Тресковец.

Пожарот во  близина на с.Крушевица  е сеуште активен. Се работи за непристапен терен, каде е зафатена деградирана шума. Ангажирани се лица од ЈП „Црн Бор“ Прилеп и од месно население.

Пожарот кај с.Никодин сеуште е активен и се наоѓа во уредена шума.  Ангажирани се  вработени од ЈП МШ „Црн Бор“ Прилеп.

Тетовски регион

Пожарот во с.Гургурница, општина Брвеница е активен. На овој пожар интервенираат екипи на Македонски Шуми и на ДЗС, како и лица од месното население.

Активен е и шумскиот пожар во с.Балиндол над рудникот, на кој дејствува екипа од ШС Шумско Шар.

Охридски регион

Активен шумски пожар има над селото Богојци, општина Струга. За гасење на пожарот ангажирани се пожарникари и вработени од ЈПСШ Јабланица – Струга.